Նորածնի լացի հիմնական պատճառները

01/09/2015

Երբեմն հնարավոր չէ հասկանալ նորածնի լացի պատճառը. երեխան կուշտ է, մայրը նրան գրկել, փայփայել է, փորձել հանգստացնելու բոլոր միջոցները, բայց ապարդյուն, երեխան մի պահ լռում է, ապա նորից լալիս: Նշանակում է պատճառն ուրիշ բան է:

Հիվանդություն

Լացի ամենահավանական պատճառը, մանավանդ երբ երեխան սովորականի պես չի լալիս, հիվանդությունն է: Անսովոր ինչ-որ բան նկատելուց հետո մայրը պետք է բժշկի դիմի. հնարավոր է` նրան անհանգստացնում է որևէ թեթև տկարություն: Մրսածությունը կամ քթի խցանումը զրկում են երեխային հարմարավետության զգացումից: Բժիշկը քթի կաթիլներ կնշանակի, և երեխայի լացը կդադարի:

Ցան և քոր շեքում /շքաբորբ/

Լացի նույնքան հավանական պատճառներից է: Եթե լացի պատճառը քորն է, պետք է երեխային հանել բարուրից, լողացնել և մերկ պառկեցնել փափուկ սրբիչի վրա:

Խիթեր /ծակծոցներ/

Սովորաբար առաջանում են օրվա նույն ժամին, ավելի հաճախ` երեկոյան: Այդ ժամանակ երեխան բարձր ու անմխիթար լալիս է 2-3 ժամ շարունակ: Ճիշտ է, դրանք վտանգավոր չեն, բայց պետք է խորհրդակցել մանկաբույժի հետ, որպեսզի ծնողները խիթերը չշփոթեն ավելի լուրջ հիվանդության հետ:

Արտաքին գրգռիչներ

Հնարավոր է երեխան մրսում է: Սենյակի ամենաբարենպաստ ջերմաստիճանը 18-21աստիճանն է: Պետք է խուսափել սենյակը չափից շատ տաքացնելուց: Եթե փոքրիկի մեջքը թաց է, ուրեմն շոգում է, հարկավոր է հագցնել ավելի թեթև հագուստ, փոխել ծածկոցը: Եթե երեխան քրտնում է, սավանի տակ պետք է սրբիչ փռել: Վառ լույսը նույնպես կարող է անհանգստացնել երեխային, հարկավոր է հետևել, որ լույսը կամ արևի շողերը երեխայի աչքերին չընկնեն:

Չսիրած զբաղմունք

Երեխային դուր չեն գալիս հագցնելը, հանելը, լողացնելը, ականջները մաքրելը, եղունգները կտրելը, հարբուխ բուժելը, աչքի կաթիլների կաթեցնելը: Որքան էլ նրանք աղեկտուր լաց լինեն, հարկավոր է այդ ամենը արագ անել, իսկ հետո գրկել, փայփայել, որպեսզի հանգստանա: