Ի՞նչ անել, որպեսզի փոքրիկը գիշերը չարթնանա, ծնողներն էլ հանգիստ քնեն

03/08/2018

 Փոքրիկի ամուր քնի մասին երազում են բոլոր ծնողները: Չէ՞ որ,  ամուր քունն առողջության գրավականն է:

Ի՞նչ անել, որ փոքրիկը լավ քնի գիշերը

  Փոքրիկի գիշերային քունն անմիջական կապ ունի այն բանի հետ, թե ինչպես է նա անցկացրել իր ցերեկը: Սակայն չպետք է մոռանալ նաև, որ երբեմն անքնության պատճառ կարող է լինել, օրինակ, փորիկի ցավը, քաղցը, ծարավը: Փոքրիկները նաև վատ են քնում առաջին ատամիկի ծկթման ժամանակ: Սակայն եթե փոքրիկն առողջ է և կուշտ, ապա վատ քնի պատճառ կարող է լինել սխալ կազմակերպված օրը:

 Որպեսզի փոքրիկը լավ քնի գիշերը, օրվա ընթացքում նա պետք է ծախսի իր ամբողջ էներգիան: Դա կարելի է անել երկու եղանակով`

1.     Մեծացնել փոքրիկի ֆիզիկական ծանրաբեռնվածությունը

2.     Մեծացնել էմոցիոնալ ծանրաբեռնվածությունը

 ֆիզիկական ակտիվությունը կեսօրին և երեկոյան կօգնեն, որպեսզի փոքրիկը հանգիստ և լավ քնի գիշերը: Եթե փոքրիկն արդեն չոչ է անում, կանգնում է կամ քայլում, ապա օրվա ընթացքում այնպես արեք, որ նա ավելի շատ շարժվի: Եթե փոքրիկը դեռ շատ փոքր է և նրա շարժվելու հնարավորությունները դեռ սահմանափակ են,  որպես ֆիզիկական ծանրաբեռնվածություն՝ կիրառեք մերսումը, մարզանքը, լոգանքը:

 Էմոցիոնալ ծանրաբեռնվածությունը կրում է անհատական բնույթ` ակտիվ շփում այլ փոքրիկների հետ,  զարգացման խաղեր և այլն: Դրանք կարող են հոգնեցնել փոքրիկին: Բայց այս դեպքում հնարավոր է նաև հակառակ էֆեկտը: Այդ իսկ պատճառով, այս պարագայում պետք է լինել հետևողական և հասկանալ, թե որ մեթոդը կարող է ճիշտ ազդել փոքրիկի վրա:

 Փոքրիկը վա՞տ է քնում: Փնտրեք խնդիրը Ձեր մեջ:

Բազմաթիվ ծնողներ կարծում են, որ եթե փոքրիկը վատ, մակերեսային է քնում, պետք է փոխել քնի ռեժիմը: Դա այդքան էլ այդպես չէ: Փոքրիկին քնի պատրաստելու և քնեցնելու որևէ ժամային օրենք գոյություն չունի, քանի դեռ փոքրիկը չի հաճախում մանկապարտեզ, դպրոց: 

Բնականաբար, երբ փոքրիկը դեռ փոքր է, գիշերը պետք է  մի քանի անգամ կերակրել նրան: Բացի այդ, երեխաներին այդ տարիքում շատ են անհանգստացնում գազիկները: Այս պարագայում մայրիկը պետք է մի քանի անգամ վեր կենա և խնամի երեխային:

Արդեն 4-5 ամսականում պետք է հասնել նրան, որ փոքրիկը կարողանա  քնել ամբողջ գիշերվա ընթացքում և արթնանալ ընտանիքի հետ միասին:

 Ինչպե՞ս երեխային վարժեցնել գիշերվա քնին.

 1.     Ապահովել հագեցած օր:

2.     Քնից 2-3 ժամ առաջ կազմակերպել զբոսանք դրսում:

3.     Քնելուց 1,5 ժամ առաջ լողացնել երեխային:

4.     Փոքրիկի սենյակում ապահովել համեմատաբար զով և խոնավ օդ. ջերմաստիճանը` 18-20 աստիճան, խոնավությունը` 60-70 տոկոս:

 Անհրաժե՞շտ է փոքրիկին բարձ

 Մեծահասակների համար երբեմն դժվար է գիտակցել, որ փոքրիկներին մինչև 1.5-2 տարեկան բարձ պետք չէ: Մինչև 2 տարեկանը նրանց մարմնի կառուցվածքը բավականին տարբերվում է մեծահասակների մարմնի կառուցվածքից: Նրանք ունեն մեծ գլուխ, կարճ վիզ և նեղ ուսեր: Մեծահասակներն օգտագործում եմ բարձ, որպեսզի պարանոցը չցավի:  Փոքրիկները չունեն դրա կարիքը: Եթե դուք կրծքով կերակրվող փոքրիկին պառկացնեք կողքի վրա, ապա կտեսնեք, որ նրա գլուխը հանգիստ է:

     Նյութի աղբյուրը՝ www.impoqrik.am