Ի՞նչ անել, երբ երեխան հրաժարվում է հավաքել խաղալիքները

30/07/2018

Շատ մայրիկների է ծանոթ այս արտահայտությունը՝ «Կհավաքես սենյակդ, կնայես մուլտֆիլմ»:

Հարց՝ աշխատու՞մ է այս մեթոդը:

Պատասխան՝ հազվադեպ:

Գործն ավարտվում է նրանով, որ երեխան այդպես էլ չի հավաքում տնով մեկ շաղ տված խաղալիքներն, իսկ զայրացած մայրիկն, այնուամենայնիվ, թույլ է տալիս դիտել մուտֆիլմ: Եկեք քննարկենք ինչպե՞ս երեխային սովորեցնել հավաքել խաղալիքները:

Հիշեք՝ մաքրասիրության շնորհը բնության կողմից չի տրվում, դա պետք է սովորեցնել երեխային դեռ փոքրուց: Իսկ ինչպե՞ս: Միայն թե ոչ շանտաժի միջոցով: Մտածեք՝ ինչ են առավել շատ սիրում անել երեխաները: Ճիշտ է, խաղալ: Դե եկեք խաղի միջոցով էլ լուծենք այս հարցը:

Խաղ-1. Մենք չենք վախենում գորշ գայլից

Առաջարկեք երեխային փրկել խաղալիքը գորշ գայլից, որը ցանկանում է տանել ու խաղալ մեր խաղալիքով: Նա նաև դեմ չէ լեգոներով իր համար տուն սարքել: Բայց չէ՞ որ դրանք մեր խաղալիքներն են, ուրեմն՝ արի հավաքենք և պահենք դրանք:

Խաղ-2. Ծննդյան հյուրեր

Սիրելի տիկնիկի ծննդյան օրն է: Հրաշալի է, ուրեմն՝ պետք է հրավիրենք և ընդունենք հյուրերի: Իսկ հյուրերը պետք է լինեն մյուս խաղալիքները: Իսկ ինչպե՞ս նրանց ընդունել, երբ սենյակում խառնաշփոթ է: Երեխային խնդրեք հավաքել խաղալիքները: Խորհուրդ՝ այս ամենից հետո փոքրիկ թեյախմություն կազմակերպեք փոքրիկի և իր սիրելի տիկնիկի հետ, չէ՞ որ նրա ծննդյան օրն է այսօր։

Խաղ-3. Ձմռան պաշար

Պատկերացրեք, որ Դուք նապաստակ եք, փոքրիկը՝ սկյուռիկ: Միասին անտառում եք և պետք է ձմռան պաշար հավաքեք: Մայրիկը հավաքում է կաղամբ (փափուկ խաղալիքները), փոքրիկը՝ ընկույզ (լեգոներ): Իսկ պաշարը պետք է ամբարել փչակում և բնում, այսինքն՝ խաղալիքների արկղում: Տեսնենք՝ ում պաշարն ավելի արագ կհավաքվի:

Խաղ-4. Հավաքում ենք և հաշվում

Եթե 5-6 տարեկան երեխան չի ցանկանում հավաքել խաղալիքները, առաջարկեք մրցել միմյանց հետ՝ ո՞վ ավելի շուտ կհավաքի 5 խորանարդիկ կամ այլ խաղալիք: Հաղթողին սպասվում է մրցանակ՝ թխվածքաբլիթ:

Խաղ-5. Խաղալիք-առեղծված

Նկարագրեք որևէ խաղալիք, իսկ երեխան պետք է գտնի այն՝ ըստ Ձեր նկարագրածի: Գործողությունն արեք այնքան, մինչև հավաքվեն թափված բոլոր խաղալիքները:

Նյութի աղբյուրը՝ www.impoqrik.am