Որքա՞ն կոնֆետ է կարելի փոքրիկին օրվա ընթացքում

27/07/2018

Այս հարցն իրենց տալիս են բոլոր ծնողները, որոնք աճող փոքրիկ ունեն: Մեկ տարեկանին մոտ հասակում արդեն փոքրիկի սննդացանկում ընդգրկվում են զանազան մրգեր, նաև շաքարավազ պարունակող ապուրներ: Ավելի ուշ հասակում փոքրիկին առաջարկում են, այսպես ասած, անմեղ կոնֆետներ` մարմելադ կամ իրիս: Կոնֆետի համը փորձելուց հետո, սակայն, փոքրիկն օրական մեկով չի բավարարվում և անընդհատ ավելին է ուզում:

Շաքարավազն իր տարատեսակներով հարկավոր է ուղեղի լավ աշխատանքի համար: Այն չարաշահել չի կարելի, բայց դրանից հրաժարումն էլ կարող է գլխացավերի ու գլխապտույտի պատճառ դառնալ. այդպես օրգանիզմը հուշում է, որ քաղցրի կարիք ունի: Ուստի քաղցրի բացառումը սննդակարգից ցանկալի չէ:

Շաքարավազն իրենից պարզ ածխաջուր է ներկայացնում և էներգիայի աղբյուր է օրգանիզմի համար: Մեծահասակի օրգանիզմին օրական հարկավոր է 50-70 գրամ քաղցր` ներառյալ կարկանդակներում ու ուտեստներում պարունակվող շաքարը: Տարեցների համար շաքարավազի օգտագործման օրական նորման 30-50 գրամ է, 1-3 տարեկան երեխաների համար` 40 գրամ, 3-6 տարեկանների համար` 50 գրամ:

Հաշվի առեք, որ փոքրիկը քաղցր ստանում է ոչ միայն թեյի կամ կոնֆետի տեսքով, այլ նաև քաղցր ապուրների, կոմպոտների, հյութերի, մրգերի ու մանկական դեսերտների տեսքով: Փոքրիկին օրական նորմայից ավել քաղցր տալով ծնողները նրան տարբեր հիվանդություններ ձեռք բերելու ռիսկին են ենթարկում. կարիես, ճարպակալում, նյութափոխանակության խանգարում, շաքարային դիաբետ:

Ըստ վիճակագրության, օրական մինչև 30 գրամ շաքարավազ օգտագործող փոքրիկները կարիես ամենաքիչն են ունենում: Իսկ եթե չափից շատ քաղցրի օգտագործումը զուգակցվում է քիչ շարժունությամբ, ապա փոքրիկի մոտ կարող է ճարպակալում սկսվել, երբ օրգանիզմն ավելի շատ էներգիա է ստանում, քան ծախսում է: Նյութափոխանակության նման խանգարումը հանգեցնում է նաև իմունիտետի թուլացման, ԿՆՀ ֆունկցիոնալ խանգարումների, ինչպես նաև մեծացնում է սիրտանոթային համակարգի հիվանդությունների հավանականությունը:

Բացի այդ, հիշեք, որ կոնֆետներն ոչ միայն շաքարավազ են պարունակում, այլ նաև այլ հավելումներ, որոնց չարաշահումը կարող է ալերգիայի պատճառ դառնալ:

Հաշվի առնելով այս ամենը` օրական փոքրիկին կարելի է տալ մեկ կոնֆետ, առավելագույնը` երեք` հաշվի առնելով քաղցրի պարունակությունը նաև մյուս սննդատեսակներում: 

 Նյութի աղբյուրը՝ www.impoqrik.am