8 տարբերակ երեխային հեռուստացույցից շեղելու համար

12/03/2018

1. Երեխայի հետ թերթեք հին ալբոմները: Երեխայի համար հետաքրքիր կլինի տեսնել՝ ինչպիսին էիք Դուք և հայրիկը փոքր հասակում, ինչպիսին էին երիտասարդ տատիկերն ու պապիկերը:
2. Փոքրիկ ճամփորդություն կազմակերպեք: Ընտանիքով կենդանաբանական այգի կամ կրկես գնացեք, այգում կամ քաղաքից դուրս փոքրիկ պիկնիկ կազմակերպեք: Ի դեպ, այս զբոսանքները մի պլանավորեք, ամեն ինչ թող հանպատրաստից լինի: Ի դեպ, կարող եք մի հետաքրքիր խաղ խաղալ՝ ամեն մեկն առաջարկում է մի ճանապարհ, տեսնենք՝ վերջում ուր կհասնեք: 
3. Ինչու՞ հյուր չգնալ: Այցելեք տատիկին ու պապիկին, հյուր գնացեք հորաքրոջը կամ մորաքրոջը, հատկապես եթե տանը փոքրիկ երեխաներ կան: 
4. Ապագայի կանխորոշում: Երևակայեք, թե ինչպիսին կլինեն մարդիկ, համակարգիչները, ինչ նոր երևույթներ կառաջանան ապագայում, գուցե ռոբոտներ ստեղծվեն: Գրեք սա, նկարեք ու պահեք այն: Տարիներ հետո հետաքրքիր կլինի բացել այն ու տեսնել՝ որքանով է կատարվել ձեր գուշակությունը: 
5. Խոհարար փոքրիկ: Երեխայի հետ միասին համեղ բլիթներ պատրաստեք ընտանիքի անդամների համար և այն գեղեցիկ ձևավորեք: 
6. Օճառային պղպջակների հրավառություն: Տարայի մեջ հեղուկ օճառ և ջուր լցրեք ու խառնեք: Հյութի ձողիկը թաթախեք ստացված զանգվածի մեջ և օդում գեղեցիկ պղպջակներ բաց թողեք: Երեխան պղպջակների այս հրավառությունից մի լավ կուրախանա: 
7. Երեխայի որոշ իրեր նվիրեք այլ երեխաների: Երեխայի հետ միասին ընտրեք այն զգեստներն ու խաղալիքները, որոնք այլևս անհրաժեշտ չեն փոքրիկին ու դրանք նվիրեք մանկատներին կամ եկեղեցիներին: Երեխան նաև կսովորի, որ իր ունեցածից պետք է բաժին առանձնացնի նաև մյուս երեխաներին: 
8. Եվ վերջապես մաքրություն: Փոքրիկի հետ խաղ խաղացեք՝ մայրիկը լվանում է ափսեները, փոքրիկը՝ չորացնում դրանք: Մտածեք մի բան, որը կկարողանա երեխան անել՝ օգնելով նաև Ձեզ:

աղբյուրը՝ impoqrik.am